শিৰিষৰ ছাঁত সাক্ষৰতাৰ যাত্ৰা

স্বৰাজ ফুকন প্ৰবক্তা, জিলা শিক্ষা আৰু প্ৰশিক্ষণ প্ৰতিষ্ঠান, ডিব্ৰুগড়
swaraj_phukan

"...আপদ আঁতৰিব, সম্পদে সংগ দিব,

ক্ষুদ্ৰই সাৱটিব বিশাল বিস্তৃতি...!"

সাক্ষৰতা | এক অমোঘ শক্তি| এই শক্তিয়ে নিৰক্ষৰক দান কৰে সাহস, আত্মবিশ্বাস, আনন্দ আৰু তৃপ্তি |

বিষাদিত, সংকোচিত জীৱনবোৰক অলপ জ্ঞান, অলপ সাহস আৰু তেনেদৰে পোহৰৰ সন্ধান দিয়া প্ৰাপ্তবয়স্ক শিক্ষাৰ লক্ষ্য| পঢ়িব-লিখিব নজনাসকলে চকু থাকিও অন্ধ বুলি নিজেই উপলব্ধি কৰে| আপ্ৰাণ চেষ্টা কৰিও সেই দুখ মচিব নোৱাৰে| কিন্তু আনন্দৰ খবৰ যে দুখ মোচনৰ উপায় আমাৰ হাততে আছে| নিৰক্ষৰক সাক্ষৰলৈ পৰিৱৰ্তন কৰি সেইসকলক প্ৰাপ্তিৰ অনাবিল আলোকেৰে আলোকিত কৰিব পাৰি; নিঃশেষ কৰিব পাৰি নিৰক্ষৰতা...

Literacy

জিলা শিক্ষা আৰু প্ৰশিক্ষণ প্ৰতিষ্ঠান, ডিব্ৰুগড়ৰ তৰফে এক যাত্ৰাঃ

প্ৰাপ্তবয়স্ক শিক্ষাৰ গুৰুত্ব আৰু উপযোগিতাৰ প্ৰতি লক্ষ্য ৰাখি জিলা শিক্ষা আৰু প্ৰশিক্ষণ প্ৰতিষ্ঠান, ডিব্ৰুগড়ৰ জিলা সমল গোটৰ (DRU) উদ্যোগত তথা চাবুৱাস্থিত খাৰজান চাহ বাগিছাৰ প্ৰশাসনৰ সহযোগত বাগিছাখনৰ পাটোৱাৰী লাইনত এক শৈক্ষিক জৰীপ চলোৱা হয়। ২০২০ চনৰ ডিচেম্বৰ মাহৰ ৯ তাৰিখে সম্পন্ন হোৱা এই জৰীপ কাৰ্যত প্ৰতিষ্ঠানৰ ডি.এল.এড আৰু বি.এডৰ ৭০ জন প্ৰশিক্ষাৰ্থীয়ে অংশগ্ৰহণ কৰে| ২০ টা প্ৰশ্ন সম্বলিত প্ৰশ্নাৱলীৰ (Questionnaire) সহায়ত ৫০ টা পৰিয়ালৰ মাজত সম্পন্ন হোৱা এই জৰীপৰ পাছত প্ৰায় ৪৫ জন লোকে প্ৰাপ্তবয়স্ক শিক্ষা গ্ৰহণৰ বাবে আগ্ৰহ প্ৰকাশ কৰে| তেওঁলোকৰ আগ্ৰহক সাৰথি কৰি ২০২১ চনৰ ৩ ফেব্ৰুৱাৰী তাৰিখে খাৰজান বাগিছা প্ৰাথমিক বিদ্যালয়ত এটা প্ৰাপ্তবয়স্ক সাক্ষৰতা কেন্দ্ৰ স্থাপন কৰা হয়। উক্ত দিনা অনুষ্ঠিত হোৱা সজাগতা বৈঠকত প্ৰায় ৫০ জন লোকে অংশগ্ৰহণ কৰে| বৈঠকত প্ৰতিষ্ঠানটোৰ প্ৰবক্তা ভূপেন কুমাৰ দাস, মলয় বৰুৱা, স্বৰাজ ফুকন, ৰঞ্জন বৰা, দুলেন চন্দ্ৰ গোহাঁই আৰু খাৰজান চাহ বাগিছাৰ কল্যাণ বিষয়া আৰু স্বাস্থ্য সহায়ক ক্ৰমে ফ্ৰেঙ্কি ৱাং আৰু চন্দন পাটোৱাৰী উপস্থিত থাকে। বৈঠকতে সকলোৰে সহমতত ফেব্ৰুৱাৰীৰ মাহৰ ৭ তাৰিখে খাৰজান বাগিছা প্ৰাথমিক বিদ্যালয়ত প্ৰাপ্তবয়স্ক সাক্ষৰতা কেন্দ্ৰটি আৰম্ভ কৰাৰ সিদ্ধান্ত গ্ৰহণ কৰা হয়।

Literacy

প্ৰকল্পটোৰ সময়সীমা হিচাপে চাৰি মাহ নিৰ্ধাৰণ কৰা হৈছে| কেন্দ্ৰটোৰ সমল ব্যক্তিৰূপে প্ৰতিষ্ঠানটোৰ প্ৰবক্তা আৰু শিক্ষক প্ৰশিক্ষাৰ্থীসকলে সেৱা আগবঢ়াই আহিছে| শ্ৰেণীসমূহ প্ৰতি দেওবাৰে পুৱা ১০ বজাৰ পৰা দুপৰীয়া ১ বজালৈ অনুষ্ঠিত হয়। কেন্দ্ৰটিত শিক্ষা গ্ৰহণ কৰি থকা শিক্ষাৰ্থীসকলক মৌলিক সাক্ষৰতা আৰু সংখ্যাৰ জ্ঞানৰ লগতে বৃত্তিমূলক শিক্ষা, দক্ষতা বিকাশ কাৰ্যসূচী প্ৰদান কৰা হৈ আছিছে যিয়ে তেওঁলোকৰ জীৱন ধাৰণৰ মান আৰু মানসিকতা উন্নত কৰাৰ বাবে নিশ্চয়কৈ বিশেষ ভূমিকা পালন কৰিব। কেন্দ্ৰলৈ পাঠ গ্ৰহণৰ বাবে অহাৰ সময়ত প্ৰাপ্তবয়স্ক শিক্ষাৰ্থীসকলৰ সৈতে তেওঁলোকৰ সন্তান তথা নাতি-নাতিনীসকলো কেন্দ্ৰটিত উপস্থিত থকা পৰিলক্ষিত হৈছিল। সেয়েহে প্ৰতিষ্ঠানৰ শিক্ষক প্ৰশিক্ষাৰ্থী সকলৰ সহায়ত কিশোৰ-কিশোৰ সকলৰ মানসিক আৰু বৌদ্ধিক বিকাশৰ বাবে প্ৰাপ্তবয়স্ক শিক্ষাৰ সমান্তৰালভাৱে অন্য এটা শ্ৰেণীকক্ষৰ ব্যৱস্থা কৰা হৈছে| শিক্ষণ সামগ্ৰীৰ সহায়ত শিশুসকলৰ শিকণ সক্ৰিয় কৰাৰ বাবে বিভিন্ন ধৰণৰ আকৰ্ষণীয় খেল খেলোৱাৰ লগতে সুপ্ত প্ৰতিভা বিকাশৰ বাবে উত্‍সাহিত কৰা হৈছে।

Literacy

আৰম্ভণিতে প্ৰাপ্তবয়স্ক শিক্ষাৰ্থীসকলক তেওঁলোকৰ নিজ নিজ নাম অসমীয়াত লিখিবলৈ সক্ষম কৰাৰ বাবে সমল ব্যক্তি সকলে চেষ্টা কৰিছিল। সেয়েহে, তেওঁলোকক তেওঁলোকৰ হাতৰ লিখন অনুশীলনৰ বাবে অসমীয় বৰ্ণমালা, বিভিন্ন প্ৰকাৰৰ চিহ্ন আৰু ৰেখাৰ যোগেদি অনুশীলন কৰোৱা হৈছিল। দেখা গৈছে যে অতি ক্ষিপ্ৰতাৰে শিক্ষাৰ্থীসকল শিক্ষা গ্ৰহণ কৰিবলৈ সক্ষম হৈছে| শিক্ষাৰ্থীসকলক অসমীয়াৰ লগতে ইংৰাজী বৰ্ণমালাৰ প্ৰাথমিক জ্ঞানো প্ৰদান কৰা হৈছে| তেওঁলোকক যোগৰ অভ্যাস কৰোৱা হৈছে যাতে পাঠদানৰ সময়ত সতেজতাৰে শিক্ষা গ্ৰহণ কৰিব পাৰে| সমল ব্যক্তিসকলে প্ৰকল্পটোৰ লক্ষ্য প্ৰাপ্ত কৰাৰ বাবে পূৰ্ণ গতিত নিয়োজিত হৈ আছে যাতে প্ৰাপ্তবয়স্ক শিক্ষাৰ্থীসকলে পৰ্যাপ্ত পৰিমাণৰ জ্ঞান লাভ কৰাৰ পিছত জীৱনৰ প্ৰতি আত্মবিশ্বাস আৰু ইতিবাচক মনোভাৱ প্ৰাপ্ত কৰিব পাৰে। বৰ্তমান কৰ'নাসৃষ্ট পৰিস্থিতিৰ বাবে পাঠদান কাৰ্যত সাময়িকভাৱে যতি পৰিছে যদিও এই পৰিস্থিতিৰ সামান্য শাম কাটিলেই পূর্ণোদ্যমে পাঠদান কাৰ্য পুনৰ আগবঢ়াই নিয়া হ'ব| পাঠদানৰ বাবে ধাৰ্য কৰা ১৬ টা সপ্তাহ সম্পূৰ্ণ হোৱাৰ পাছত শিক্ষাৰ্থীসকলে কিমান পৰিমাণে অগ্ৰগতি লাভ কৰিবলৈ সক্ষম হৈছে সেয়া সমীক্ষা কৰিবলৈ এক বিশেষ পৰীক্ষা অনুষ্ঠিত কৰা হ'ব আৰু সফল শিক্ষাৰ্থীসকলক প্ৰমাণপত্ৰ প্ৰদান কৰা হ'ব|

Literacy

নিৰক্ষৰক সাক্ষৰ কৰাৰ এই যাত্ৰা চলি থাকিব আৰু এই যাত্ৰাই নিশ্চিত সম্ভাৱনা কঢ়িয়াই আনিব |

Literacy Literacy