তত্ত্বাবধায়কৰ একাষাৰ

সংগীতা গোস্বামী জিলা আঁচনি বিষয়া ( শিক্ষক প্ৰশিক্ষণ), সমগ্ৰ শিক্ষা, কামৰূপ
sangita goswami

জয় জয়তে 'গুৰুবাৰ্তা' ৰ সমূহ শিক্ষাগুৰু, ছাত্ৰ-ছাত্ৰী তথা পাঠক-পাঠিকালৈ আন্তৰিক অভিনন্দন জ্ঞাপন কৰিলোঁ। প্ৰথম সংখ্যা 'গুৰুবাৰ্তা' বৈদ্যুতিন আলোচনী খনে পঢ়ুৱৈ সমাজত যথেষ্ট সমাদৰ লাভ কৰিছে, সেয়ে 'গুৰুবাৰ্তা' ৰ দ্বিতীয় সংখ্যাটি আপোনালোকলৈ আগবঢ়ালো। আশা ৰাখিছোঁ এইবাৰৰ সংখ্যাটিয়ে শিক্ষাগুৰু সকল তথা পঢ়ুৱৈ সমাজৰ পৰা সমাদৰ লাভ কৰিব লগতে জিলাখনৰ শৈক্ষিক ক্ষেত্ৰখন আগুৱাই নিয়াত অগ্ৰণী ভূমিকা গ্ৰহণ কৰিব।

সাম্প্ৰতিক সময়ত ক'ভিড সৃষ্ট পৰিৱেশত ছাত্ৰ-ছাত্ৰীসকলৰ শিকন ঘাটি নোহোৱাকৈ শৈক্ষিক দিশত আগবঢ়াই লৈ যোৱাটো শিক্ষক-শিক্ষয়িত্ৰী, অভিভাৱক-অভিভাবিকাসকলৰ বাবে এক প্ৰত্যাহ্বান স্বৰূপ। নতুন শৈক্ষিক বৰ্ষৰ আৰম্ভণিতে ক'ভিড-১৯ , অতিমাৰীৰ সংক্ৰমণৰ পৰিপ্ৰেক্ষিতত বিদ্যালয়সমূহে চৰকাৰী ভাবে বন্ধ ঘোষণা কৰে। ফলত ছাত্ৰ-ছাত্ৰীসকল ঘৰত আবদ্ধ হৈ পৰে। এনে এক পৰিৱেশত ছাত্র-ছাত্ৰীসকলক শৈক্ষিক দিশত আগবঢ়াই নিয়াৰ বাবে শিক্ষাগুৰু সকলে বৈদ্যুতিন মাধ্যমেৰে পাঠদান কৰিছে যদিও, এই মাধ্যমৰ যোগেদি সকলো ছাত্ৰ-ছাত্ৰীক সামৰিব পৰা নাযায়। বৈদ্যুতিন মাধ্যমে ঢুকি নোপোৱা চৰ-চাপৰি অথবা পাহাৰীয়া অঞ্চলৰ ছাত্ৰ-ছাত্ৰীৰ বাবে জিলাখনত 'কিৰণ' নামৰ কাৰ্যসূচীৰ জৰিয়তে প্ৰথম শ্ৰেণীৰ পৰা অষ্টম শ্রেণীৰ ছাত্ৰ-ছাত্ৰীৰ বাবে অভিজ্ঞ শিক্ষকৰ দ্বাৰা আৰ্হি কৰ্মপত্ৰ প্ৰস্তুত কৰা হৈছে। স্থানীয় শিক্ষক-শিক্ষয়িত্ৰী তথা বিদ্যালয় পৰিচালনা সমিতিৰ সদস্য অথবা অভিভাৱক-অভিভাৱিকা সকলৰ যোগেদি এই কৰ্মপত্ৰ বিতৰণ কৰা হৈছে আৰু নিৰ্দিষ্ট সময়ৰ ভিতৰত কৰ্মপত্ৰৰ ক্ৰিয়াকলাপ সমূহ ছাত্ৰ-ছাত্ৰীয়ে সম্পূর্ণ কৰিলে পুনৰ মূল্যায়নৰ বাবে ছাত্ৰ-ছাত্ৰীৰ পৰা সংগ্রহ কৰা হ'ব।

পৰবৰ্তী পৰ্যায়ত শিক্ষক-শিক্ষয়িত্ৰীসকলে উক্ত আৰ্হিৰ কাৰ্যপত্ৰৰ আধাৰত শিকন ফলাফল ও পাঠভিত্তিক কৰ্মপত্ৰ প্ৰস্তুত কৰি ছাত্র-ছাত্ৰীসকললৈ প্ৰেৰণ কৰিব।

বিদ্যালয় বন্ধৰ সময়ছোৱাত ছাত্ৰ-ছাত্ৰীৰ শাৰীৰিক ও মানসিক স্বাস্থ্য অটুট ৰাখিবৰ বাবে ল'বলগীয়া ব্যৱস্থা সম্পৰ্কে অভিভাৱকসকলৰ লগত বৈদ্যুতিন মাধ্যম অথবা আন কোনো মাধ্যমৰ জৰিয়তে বাৰ্তালাপ কৰিব। শিক্ষক-শিক্ষয়িত্ৰী বা অভিভাৱক-অভিভাবিকা সকলে ছাত্র-ছাত্ৰীৰ এখন দৈনিক ৰুটিন প্ৰস্তুত কৰাত সহায় কৰিব আৰু উক্ত ৰুটিনত শৈক্ষিক ক্ৰিয়া-কলাপৰ উপৰিও শাৰীৰিক, মানসিক উৎকৰ্ষ সাধনৰ বাবে ব্যায়াম, যোগাসন, সৃজনীমূলক প্ৰতিভা বিকাশৰ বাবে গল্প, কবিতা লিখা, ছবি অঁকা ইত্যাদি ক্ৰিয়া-কলাপ অন্তৰ্ভুক্ত কৰিব।

এই সুযোগতে আপোনালোকক জনাই থওঁ যে , ভাৰত চৰকাৰৰ মানৱ সম্পদ বিকাশ মন্ত্ৰণালয়ৰ সৌজন্যত বিদ্যালয়ৰ ছাত্ৰী-ছাত্ৰীৰ সৰ্বাঙ্গীন বিকাশৰ বাবে বিভিন্ন কাৰ্যসূচী গ্ৰহণ কৰিছে আৰু উক্ত কাৰ্যসমূহ বিদ্যালয় পৰ্যায়ত পৰিকল্পনা কৰিবৰ বাবে নিৰ্দেশনা প্ৰেৰণ কৰিছে। ইয়াৰ ভিতৰত অন্যতম "বন্ধু বিদ্যালয় কাৰ্যসূচী", ইয়াৰ উদ্দেশ্য বাছনিকৃত দুখন বিদ্যালয়ৰ (Twinning of schools) মাজত বন্ধুত্ব স্থাপন কৰি এখন বিদ্যালয়ৰ ছাত্র-ছাত্ৰীয়ে আন খন বিদ্যালয়ৰ ছাত্ৰ-ছাত্ৰীৰ শৈক্ষিক উত্তৰণত সহায় কৰা। ছাত্ৰ-ছাত্ৰীৰ মাজত বিভিন্ন প্ৰতিযোগিতা অথবা ক্ৰিয়া-কলাপ অনুষ্ঠিত কৰি প্ৰতিযোগিতামূলক মনোভাব গঢ়ি তোলাৰ লগতে বিদ্যায়তনিক আৰু সহ-বিদ্যায়তনিক দিশত ছাত্ৰ-ছাত্ৰীক আগবঢ়াই গুৰুত্বপূৰ্ণ ভূমিকা গ্ৰহণ কৰা।

"যুৱ পাৰিপাৰ্শ্বিক সংঘ" কাৰ্যসূচীৰ অধীনত বিদ্যালয় সমূহক পুঁজিৰ যোগান ধৰা হৈছে। এই পুঁজি প্ৰাথমিক বিদ্যালয়ৰ বাবে পাঁচ (৫) হাজাৰ, উচ্চ প্ৰাথমিকৰ বিদ্যালয়ৰ বাবে পোন্ধৰ (১৫) হাজাৰ আৰু মাধ্যমিক বিদ্যালয়ৰ বাবে চৌব্বিছ হাজাৰ পাঁচশ (২৪,৫০০) পুঁজিৰ যোগান ধৰা হৈছে।

জিলাখণ্ড আৰু মণ্ডল পৰ্যায়ত অভিজ্ঞ শিক্ষকক লৈ সমল গোট (Resource Pool) গঠন কৰি জিলা খণ্ড অথবা মণ্ডল পৰ্যায়ত সমল গোটৰ সহায়ত ছাত্র-ছাত্ৰীৰ শৈক্ষিক উত্তৰণৰ বাবে বিভিন্ন কাৰ্যসূচী প্ৰস্তুত কৰি কাৰ্যকৰী কৰা। উক্ত খণ্ড আৰু মণ্ডল পৰ্যায়ৰ শিকন-শিক্ষণ সামগ্রী ক্ৰয় কৰিবৰ বাবে বিভাগীয় ভাৱে খণ্ড পৰ্যায়ত দহ হাজাৰ (১০, ০০০) আৰু মণ্ডল পৰ্যায়ত তিনি হাজাৰ (৩০০০) টকাকৈ পুঁজিৰ যোগান ধৰে।

"ৰাষ্ট্ৰীয় আৱিষ্কাৰ অভিযান" (RAA) ৰ অধীনত বিজ্ঞান শিক্ষা প্ৰচাৰ তথা ছাত্ৰ-ছাত্ৰীৰ মাজত জনপ্ৰিয় কৰি তুলিবৰ বাবে বিভিন্ন কাৰ্যসূচী গ্ৰহণ কৰা হৈছে আৰু এই কাৰ্যসূচী সমূহ কাৰ্যকৰী কৰিবৰ বাবে বিদ্যালয় পৰ্যায়ত পুঁজি যোগান ধৰা হৈছে আৰু নিৰ্দেশাৱলী প্ৰেৰণ কৰা হৈছে।

চলিত শিক্ষাবৰ্ষৰ এপ্ৰিল মাহত "অসম অলিম্পিয়েদ" ষষ্ঠ শ্ৰেণীৰ পৰা দ্বাদশ শ্ৰেণীৰ ছাত্র-ছাত্ৰীৰ বাবে অনুষ্ঠিত হৈ যায়। জিলাখনৰ বহু ছাত্র-ছাত্ৰীয়ে এই পৰীক্ষাত অংশগ্ৰহণ কৰে। ইয়াৰ মূখ্য উদ্দেশ্য হৈছে চৰকাৰী বিদ্যালয়ত অধ্যয়নৰত ছাত্ৰ-ছাত্ৰীৰ মনত এক প্ৰতিযোগিতামূলক মনোভাব গঢ়ি তোলা লগতে মেধা শক্তিৰ পৰীক্ষা কৰা আৰু পৰবৰ্তী পৰ্যায়ত শৈক্ষিক উত্তৰণত সহায় কৰা। ছাত্ৰ-ছাত্ৰীক ৰাজ্যিক অথবা ৰাষ্ট্ৰীয় পৰ্যায়ৰ বিভিন্ন প্ৰতিযোগিতামূলক পৰীক্ষাত অংশগ্ৰহণ কৰিবলৈ অনুপ্ৰেৰণা যোগোৱা।

বিজ্ঞান আৰু গণিতৰ প্ৰতি ছাত্ৰ-ছাত্ৰীক আকৰ্ষিত কৰিবৰ বাবে উচ্চ পৰ্যায়ৰ বিদ্যালয়ত "বিজ্ঞান আৰু গণিত সংঘ" গঠন কৰিবলৈ নিৰ্দেশাৱলী প্ৰেৰণ কৰিছে। এই কাৰ্যসূচী সুচাৰুৰূপে পৰিচালনা কৰিবৰ বাবে প্ৰতিখন উচ্চ প্ৰাথমিক বিদ্যালয়ত দহ হাজাৰ (১০, ০০০) টকাকৈ দিয়া হৈছে।

বিজ্ঞান আৰু গণিত শিক্ষা অধিক মনোগ্ৰাহী আৰু হাতে-কামে কৰিবৰ বাবে বিজ্ঞান আৰু গণিত বিষয়ৰ আহিলা বাকচ ( Science and Math's Kit Box) উচ্চ প্ৰাথমিক বিদ্যালয় সমূহত দিয়া হৈছে। পাঠৰ লগত সংগতি ৰাখি এই আহিলাসমূহ ছাত্ৰ-ছাত্ৰীক ব্যৱহাৰ কৰিবলৈ সুযোগ দিলে বিজ্ঞান আৰু গণিত শিক্ষাৰ প্ৰতি তেওঁলোক আকৰ্ষিত হোৱাৰ লগতে এই শিক্ষাই স্থায়ীত্ব লাভ কৰিব।

"ৰাষ্ট্ৰীয় আৱিষ্কাৰ অভিযান"ৰ অন্যতম কাৰ্যসূচী হৈছে উচ্চশিক্ষা প্ৰতিষ্ঠানৰ দ্বাৰা উচ্চ প্ৰাথমিক অথবা মাধ্যমিক পৰ্যায়ৰ বিদ্যালয়ত শৈক্ষিক সহায় আগবঢ়োৱা (Mentoring of Schools by Higher Educational institutions)। বিজ্ঞান শাখা থকা উচ্চ শিক্ষা প্ৰতিষ্ঠানৰ যোগেদি বিজ্ঞান আৰু গণিত বিষয়ত বিভিন্ন কাৰ্যসূচী অনুষ্ঠিত কৰি ছাত্ৰ-ছাত্ৰীৰ শৈক্ষিক উত্তৰণ ঘটোৱা লগতে বিজ্ঞান আৰু গণিত বিষয়ৰ ভেঁটি মজবুত কৰা। জিলাখনৰ এশ (১০০) খন বিদ্যালয়ত এই কাৰ্যসূচী কৰা হৈছে আৰু উক্ত বিদ্যালয় সমূহত পাঁচ হাজাৰ (৫০০০) টকাকৈ পুঁজিৰ যোগান ধৰা হৈছে।

ইয়াৰ উপৰিও সকলো বিদ্যালয়ত "পুথিভঁৰাল" স্থাপনৰ বাবে পুথিৰ যোগান ধৰা হৈছে। পুথিভঁৰালৰ পুথি ছাত্ৰ-ছাত্ৰীক অধ্যয়ন কৰিবলৈ দিলে , তেওঁলোকৰ পঠন অভ্যাস গঠন আৰু বিভিন্ন বিষয়ৰ জ্ঞান আহৰণত সুবিধা হ'ব। শিক্ষকৰ সহযোগত ছাত্ৰ-ছাত্ৰীক পুথিভঁৰাল পৰিচালনাৰ দায়িত্ব দিলে , তেওঁলোকে পুথিভঁৰালৰ উপযুক্ত ব্যৱহাৰ সম্পৰ্কে শিকিব পাৰিব।

এনেদৰে চৰকাৰী আঁচনিসমূহৰ সঠিক ৰূপায়ণ আৰু শিক্ষাগুৰু সকলৰ নিজা উদ্ভাৱনীমূলক চিন্তাৰে আগবাঢ়িলে আমাৰ ভৱিষ্যত প্ৰজন্মক একো একোজন সুনাগৰিক হিচাপে গঢ়ি তুলিবলৈ সক্ষম হ'ব।