বৈদ্যুতিন মাধ্যমেৰে সামৰিব নোৱাৰা অঞ্চলত শৈক্ষিক কাৰ্যক্ৰম 'কিৰণ' _এক চমু আলোচনা

অপুৰ্ব ঠাকুৰীয়া কামৰূপ জিলা প্ৰাথমিক শিক্ষা বিষয়া
ApurbaThakuria

আমি সকলোৱে অৱগত যে কোভিড সৃষ্ট পৰিস্থিতিৰ প্ৰভাৱ সকলো ক্ষেত্ৰতে পৰিছে। শিক্ষাখণ্ডও ইয়াৰ ব্যতিক্ৰম নহয়। শিক্ষাৰ্থী সকলৰ স্বাস্থ্যৰ প্ৰতি লক্ষ্য ৰাখি আমাৰ ৰাজ্যৰ বিদ্যালয় সমূহত নিয়মীয়া পাঠদান যোৱা এপ্ৰিল মাহৰ শেষৰ সপ্তাহৰ পৰা পৰ্যায়ক্ৰমে বন্ধ ৰাখিব লগীয়া হৈছে। কাজেই শিক্ষাৰ্থীৰ শিকন ঘাটি হোৱাৰ এক নেতিবাচক সম্ভাৱনা প্ৰকট হৈ পৰিছে। তাৰোপৰি, এনে সময়ত বিশেষকৈ স্কুলীয়া পৰ্যায়ৰ শিক্ষাৰ্থী সকলক শাৰীৰিক আৰু মানসিক ভাৱে সবল কৰি ৰাখি সৃষ্টিমূলক কামত জড়িত কৰি ৰখাটো অভিভাৱক, শিক্ষক তথা শিক্ষা বিভাগৰ বাবে এক ডাঙৰ প্ৰত্যাহ্বান হিচাবে থিয় দি উঠিছে। গুৰুত্বপূৰ্ণ কথাটো হ'ল এই যে এনে প্ৰত্যাহ্বান নেওচিবলৈ সৰ্বত্ৰতে প্ৰচেষ্টা অব্যাহত আছে।

কোভিডৰ প্ৰভাৱ সকলো শিক্ষাৰ্থীৰ ক্ষেত্ৰতে কম-বেছি পৰিমাণে পৰিছে যদিও বিশেষকৈ অনুন্নত, পিছপৰা অঞ্চল বা আৰ্থিকভাৱে জুৰুলা পৰিয়ালৰ ছাত্ৰ-ছাত্ৰীৰ ক্ষেত্ৰত বাৰুকৈয়ে পৰিছে।‌ আৰ্থিক অনাটনৰ মাজতে এনে শিশুসকলে শিক্ষা আৰু স্বাস্থ্যৰ ক্ষেত্ৰত এক অত্যন্ত কঠিন সময় পাৰ কৰিব লগীয়া হৈছে। কোৱা নিস্প্ৰয়োজন যে দুৰ্যোগৰ এই সময়তো এচাম শিক্ষাৰ্থীয়ে বৈদ্যুতিন (online) মাধ্যমৰে শিক্ষা-গ্ৰহণ প্ৰক্ৰিয়া অব্যাহত ৰাখিব পাৰিছে যদিও ওপৰোক্ত বুজন সংখ্যক শিশুৱে এনে সুবিধাৰ পৰা বঞ্চিত হৈছে। প্ৰকাৰন্তৰে আৰ্থিক আৰু সামাজিক অসমতাৰ ছবিখনো প্ৰকট হৈ পৰিছে। কোৱা বাহুল্য যে বিগত বছৰৰ পৰা এই সময়লৈকে কোভিড উদ্ভূত পৰিস্থিতিৰ বাবে অসমতাৰ এই ছবিখন কামৰূপ জিলাতো কিছু পৰিমাণে দৃশ্যমান হৈছে। অৱশ্যে, এনে পৰিস্থিতিত সংশ্লিষ্ট সকলোৱে সময়োপযোগী ব্যৱস্থা ললেহে অসমতাৰ এই ব্যৱধান নোহোৱা কৰিব পৰা যাব বুলি আমাৰ মনে ধৰে।

কামৰূপ জিলাৰ কিছু বিদ্যালয়ৰ ৩৫৮ গৰাকী অভিভাৱকক লৈ সমগ্ৰ শিক্ষা, কামৰূপ আৰু স্বেচ্ছাসেৱী সংগঠন 'মাতৃ'ৰ উদ্যোগত 'Impact of Covid-19 on Children with special focus on Virtual Education' শীৰ্ষক এক গৱেষণাধৰ্মী সমীক্ষা যোৱা বছৰৰ শেষৰফালে কৰা হৈছিল। সেই সময়ত কোভিড সৃষ্ট পৰিস্থিতিৰ বাবে ৰাজ্য তথা জিলা স্তৰৰ পৰা বৈদ্যুতিন মাধ্যমেৰে শিক্ষা প্ৰদানৰ ব্যৱস্থা লোৱা হৈছিল যদিও সমীক্ষাত দেখা গ'ল যে প্ৰায় ২৫ শতাংশ শিক্ষাৰ্থীয়ে তেনে সুবিধা লাভৰ পৰা বঞ্চিত হৈছিল। তাৰোপৰি, ৪৬ শতাংশ শিক্ষাৰ্থীয়ে বৈদ্যুতিন মাধ্যমৰ সুবিধা পাইছিল যদিও নিয়মীয়াকৈ পাঠ গ্ৰহনৰ ক্ষেত্ৰত ভালেমান অসুবিধাৰ সন্মুখীন হৈছিল। লগতে, এই অধ্যয়নে সামৰি লোৱা অভিভাৱক সকলৰ ৫৩ শতাংশই ক'ব খোজে যে বৈদ্যুতিন মাধ্যমে শিক্ষাৰ্থীৰ ৫০ শতাংশ শৈক্ষিক প্ৰয়োজনীয়তাহে পূৰ কৰিব পাৰে। উল্লেখ্য যে মতদাতা সকলৰ ৩৭ শতাংশৰ মতে বৈদ্যুতিন ব্যৱস্থা শিকন-শিক্ষণ প্ৰক্ৰিয়াৰ কিছু পৰিমাণে সহায়ক মাধ্যম হলেও গতানুগতিক শিক্ষা পদ্ধতিৰ বিকল্প মাধ্যম হ'ব নোৱাৰে।‌ মন কৰিবলগীয়া কথাটো হ'ল, কোভিডৰ দ্বিতীয় ঢৌৰ বাবে বিদ্যালয়ৰ পাঠদান বন্ধৰ এই সময়ছোৱাত সমীক্ষাৰ ফলাফলে বিশেষ তাৎপৰ্য বহন কৰিছে তথা জিলাখনৰ বৈদ্যুতিন মাধ্যমে ঢুকি নোপোৱা অঞ্চলৰ শিক্ষাৰ্থী সকলক শৈক্ষিক সহায় আৰু সমৰ্থন জনোৱাৰ বাবে প্ৰয়োজনীয় বিকল্প আৰু উদ্ভাৱনীমূলক কাৰ্যৰ দিহা কৰিবলৈ সংশ্লিষ্ট সকলোৰে চিন্তাৰ বাট মুকলি কৰি দিছে ।

এনে চিন্তাৰ আলমত তথা বাৰাংহাটী উচ্চ বুনিয়াদী বিদ্যালয়ৰ শিক্ষকসকলে বিদ্যালয় বন্ধৰ সময়ত গৃহ কৰ্ম দিয়াৰ বিশেষ অভ্যাসৰ (Best practice) আভাস লৈ আৰু সমগ্ৰ শিক্ষা, কামৰূপৰ বিষয়া-কৰ্মী সকলৰ মন্থনৰ ফলত জিলাখনৰ বৈদ্যুতিন মাধ্যমে ঢুকি নোপোৱা ১৭৯খন বিদ্যালয়ৰ ছাত্ৰ-ছাত্ৰীক সামৰি অলপতে 'কিৰণ' (KIRAN- Kamrup Initiated Remedial And Novel-Support) শীৰ্ষক এক বিশেষ কাৰ্যক্ৰম ৰূপায়নৰ পৰিকল্পনা কৰা হয়। আৰু এই পৰিকল্পনাক সাকাৰ ৰূপ দিবলৈ আগবাঢ়ি আহে জিলাখনৰ কেইগৰাকীমান আগ্ৰহী, কৰ্তব্য পৰায়ন, নিষ্ঠাবান, অভিজ্ঞ শিক্ষাগুৰু। শিক্ষাগুৰু সকলে 'কিৰণ' ৰ উদ্দেশ্যেৰ লগত সংগতি ৰাখি খুউব কম দিনৰ ভিতৰতে প্ৰথম শ্ৰেণীৰ পৰা অষ্টম শ্ৰেণীৰ শিক্ষাৰ্থীৰ উপযোগীকৈ আৰ্হি মূলক ভাৱে প্ৰস্তুত কৰি তোলে এলানি কৰ্মপত্ৰ। প্ৰাৰম্ভিকতে ১৫ দিনৰ বাবে অসমীয়াৰ লগতে গাৰো, বড়ো, বাংলা, হিন্দী মাধ্যমত মূল বিষয় (Core subjects) কেইটিৰ বাবে প্ৰস্তুত কৰা এই কৰ্মপত্ৰ সমূহ সংশ্লিষ্ট শিক্ষকসকলৰ জৰিয়তে সম্পূৰ্ণ কোভিড প্ৰট'কল মানি অভিভাৱকৰ সহযোগত শিক্ষাৰ্থীৰ হাতত তুলি দিয়াৰ ব্যৱস্থা কৰা হয়। অৱশ্যে, শিক্ষাগুৰু সকলে প্ৰস্তুত কৰা এই কৰ্মপত্ৰসমূহ ছপা কৰি শিক্ষাৰ্থীৰ ওচৰলৈ লৈ যোৱাৰ আগতে ডায়েট, কামৰূপৰ প্ৰবক্তাকে প্ৰমুখ্যে কৰি অভিজ্ঞ ব্যক্তিৰ দ্বাৰা পুনঃনিৰিক্ষণ কৰাৰো ব্যৱস্থা কৰা হয়। উল্লেখ্য যে কামৰূপৰ জিলা উপায়ুক্তই ৯ মে,২০২১ তাৰিখে শুভাৰম্ভণি কৰা এই কাৰ্যসূচী সমগ্ৰ শিক্ষা, কামৰূপৰ প্ৰত্যক্ষ তদাৰকত জিলাখনত ৰূপায়নৰ দিহা কৰা হয়। এই সন্দৰ্ভত সমগ্ৰ শিক্ষা, কামৰূপৰ জিলা মিছন সমন্বয়কে সংশ্লিষ্ট সকলোকে কাৰ্যসূচীটো ৰূপায়নৰ ক্ষেত্ৰত সহযোগ আগবঢ়াবলৈ আহ্বান জনোৱাৰ লগতে শিক্ষক সকলক এই কৰ্মপত্ৰৰ আৰ্হিত নিজ নিজ বিদ্যালয়ৰ শিক্ষাৰ্থী সকলক পৰৱৰ্তী সময়ৰ বাবে কৰ্মপত্ৰ প্ৰস্তুত কৰি দিবলৈও নিৰ্দেশনা জাৰি কৰে।

জানিব পৰা মতে কাৰ্যসূচীটোৱে ইতিমধ্যে বিভিন্ন স্তৰত সমাদৰ লাভ কৰিছে। আনকি বৈদ্যুতিন মাধ্যমে ঢুকি পোৱা অঞ্চলৰ ভালেমান বিদ্যালয়তো শিক্ষকসকলে এই কৰ্মপত্ৰ সমূহ ছাত্ৰ-ছাত্ৰীৰ হাতত তুলি দিছে। জিলাখনৰ শৈক্ষিক ক্ষেত্ৰখনৰ বাবে এয়া নিশ্চয় ভাল খবৰ। আশা কৰা হৈছে, কিৰণ কাৰ্যসূচীৰ মাধ্যমেৰে আগবঢ়োৱা শৈক্ষিক সমৰ্থনৰ জৰিয়তে কোভিডৰ এই দুৰ্যোগৰ সময়তো বৈদ্যুতিন মাধ্যমে সামৰিব নোৱাৰা অঞ্চলৰ শিক্ষাৰ্থী সকলক অইন অঞ্চলৰ শিক্ষাৰ্থীৰ লেখিয়াকৈ শিকন ঘাটি নোহোৱাকৈ শৈক্ষিক দিশত আগবঢ়াই লৈ যাবলৈ সমৰ্থ হ'ব পৰা যাব‌। কোৱা যুগুত যে কাৰ্যসূচীটো সফলতাৰে ৰূপায়িত হ'লে জিলাখনৰ শিক্ষাক্ষেত্ৰত ই নিঃসন্দেহে মাইলৰ খুঁটি হিচাপে চিহ্নিত হৈ ৰ'ব ।।

Serahali-2 Serahali-2 Serahali-2 Serahali-2 Serahali-2 Serahali-2 Serahali-2 Serahali-2 Serahali-2