অণুগল্প/ আনন্দ

দিপাশ্ৰী দত্ত সহকাৰী শিক্ষয়িত্ৰী,বঙৰা তালুকদাৰপাৰা বালিকা প্ৰাথমিক বিদ্যালয়
dipashri
ৰিংকু চতুৰ্থ শ্ৰেণীত পঢ়ে। সি লৰালৰিকৈ ইউনিফৰ্ম যোৰ পিন্ধি বিদ্যালয়লৈ যাবলৈ সাজু হ'ল।মাকে বাঢ়ি দিয়া ভাতকেইটা খাই বেগটো পিঠিত লৈ সি স্কুললৈ বুলি দৌৰ মাৰিলে।ঘৰৰ পৰা স্কুললৈ খোজেৰে গ'লে মাত্ৰ ১০ মিনিটৰ বাট। এনেতে স্কুল পাবলৈ অলপমান দূৰ থকাত বাটৰ কাষতে এটা ৫০ টকীয়া নোট পৰি থকা দেখা পালে। পইচাটো দেখি তাৰ মনত বৰ আনন্দ লাগিল। সি পইচাটোৰে কি কি বস্তু কিনিব মনতে থিৰাংয়েই কৰি পেলালে। কোনেও নেদেখাকৈ পইচাটো তুলি লৈ সি স্কুললৈ বুলি খোজ ল'লে।কিছু দূৰ যোৱাৰ পাছতে তাৰ মনটো কিবা দুখী দুখী যেন লাগিবলৈ ধৰিলে।সি যেন পইচাটো লৈ ভুল কৰিলে তেনেকুৱা লাগিবলৈ ধৰিলে আৰু স্কুলৰ কাষতে বহা খুজনীয়া ৰমেন কাইক পইচাটো দি দিলে। লগে লগে তাৰ মনলৈ এক আনন্দৰ জোৱাৰ বৈ আহিল।

-----------