খণ্ড সমল ব্যক্তিৰ (BRP) দায়িত্ব, কৰ্তব্য আৰু অভিজ্ঞতাৰ ৰূপৰেখাঃ

কমলেশ্বৰ ডেকা প্ৰাক্তন অধ্যক্ষ, জৱাহৰজ্যোতি উঃ মাঃ বিদ্যালয়, পুঠিমাৰী।

 

অসতো মা সদ্ গময়
তমসো মা জ্যোতিৰ্গময়
মৃত্যুৰ্মা অমৃতং গময়
ওম  শান্তি  শান্তি
প্ৰভূ মোক অনিত্য অজ্ঞানতাৰ পৰা চিৰন্তন সত্য জ্ঞানৰ দিশে লৈ যোৱা। মোক আন্ধাৰৰ পৰা পোহৰলৈ লৈ যোৱা। মৃত্যুৰ পৰা অমৰত্বলৈ লৈ যোৱা।
উল্লেখিত পৱিত্ৰ বৃহদাৰণ্যক উপনিষেদত এই মন্ত্ৰৰে উদ্বুদ্ধ অতীজৰে পৰা ভাৰতৰ শিক্ষা ব্যবস্থা, শিক্ষকৰ দায়বদ্ধতা আৰু শিষ্যৰ একনিষ্ঠতাৰ ভেটিঁটো  সচাঁকৈ বহুত সবল।  শিক্ষাৰ যোগেদিয়েই জীৱৰ শ্ৰেষ্ঠত্ব প্ৰমাণ কৰিবলৈ মানুহ সক্ষম হৈ উঠিছে।
সুদীর্ঘ উনচল্লিশ বছৰ শিক্ষকতাৰ অন্তত অৱসৰ গ্রহণৰ পিছত খণ্ড সমল ব্যক্তি হিছাপে হাজো শিক্ষা খণ্ডত  সৰ্বশিক্ষাৰ অধীনত কাম কৰাৰ সৌভাগ্য ঘটিছিল। সৰ্বশিক্ষাৰ বাচনি পৰীক্ষাৰ ভিত্তিত সমগ্র অসমত ৭/০২/ ১৫ ইংৰাজী তাৰিখৰ  নিৰ্দেশনা মৰ্মে মুঠ চল্লিশ গৰাকী  খণ্ড সমল ব্যক্তিক  বিভিন্ন শিক্ষাখণ্ডত মকৰল কৰিছিল। সেই অনুসৰি কামৰূপ জিলাতো বাৰ গৰাকী খণ্ড সমল ব্যক্তিক নিযুক্তি দিয়ে। তাৰ ভিতৰত সমাজ বিজ্ঞানৰ ৬ গৰাকী, অসমীয়াৰ তিনি গৰাকী, ইংৰাজীৰ এগৰাকী আৰু বিজ্ঞানৰ ২ গৰাকী।  ইয়াৰে আমি চাৰি গৰাকী আছিলো অৱসৰপ্ৰাপ্ত শিক্ষক। নিযুক্তি পোৱাৰ পিছত  আমি কি কাম কৰিব লাগিব একো ভাবি পোৱা নাছিলো।  আনহাতে আমাক প্ৰাৰম্ভিক পৰ্যায়ত কোনো ধৰণৰ প্ৰশিক্ষণৰ ব্যবস্থা কৰা নাছিল। তথাপিও এইটো জানিছিলো যে আমাৰ শিক্ষকতা জীৱনৰ সঞ্চিত অভিজ্ঞতা খিনি শিক্ষা খণ্ডটোৰ অন্তৰ্গত বিদ্যালয় সমূহত ঐকান্তিকতাৰে উত্তৰণ ঘটাই উন্নতি সাধন কৰা। প্ৰাৰম্ভিক অৱস্থাত মই মাহটোৰ বাবে এখন দিনলিপি( Advance tour diary)  প্ৰস্তুত কৰি কোন কোন বিদ্যালয় নিৰীক্ষণ কৰিম আৰু কেনেকৈ Academic Support দি শৈক্ষিক দিশত উত্তৰণ ঘটাব পাৰিম তাৰে আৰ্হি প্ৰস্তুত কৰি লৈছিলো। বিশেষকৈ তলত উল্লেখিত কথা কেইটাৰ ওপৰত গুৰুত্ব দি কামত আগবাঢ়িছিলোঁ।
১) শিকনৰ কৃতকাৰ্যতা ক্ৰমাগত ভাৱে হৈ উঠিব পৰাকৈ অধ্যয়নৰ বিষয়বস্তু পৰ্য্যায় ক্ৰমে কঠিনতাৰ ভিত্তিত প্ৰস্তুত কৰা।
২) সাৰ্থক শিক্ষা দানৰ বাবে শিশু সকলৰ মাজত পৰিৱেশ সুখদায়ক আৰু আনন্দদায়ক কৰি তোলা।
৩) শিক্ষকে অধ্যয়নত ব্ৰতী ছাত্ৰ ছাত্ৰী সকলৰ পুৰস্কাৰ, প্ৰসংশা, আদিৰে উৎসাহিত কৰা।
৪) শিক্ষা আহৰণক পুৰস্কৃত কৰিলে শিক্ষাৰ্থীৰ মনোকামনা পূৰণ হয় আৰু মনত প্ৰণোদনৰ সৃষ্টি হয়।
দিনচেৰেক পিছত আমি যেতিয়া চুক্তিনামাত স্বাক্ষৰ কৰিছিলোঁ তেতিয়া সেইমৰ্মে আমাক কিছুমান কামৰ দায়িত্ব অৰ্পণ কৰিছিল। সেইবোৰ হ'ল--
১) শৈক্ষিক সহযোগী হিচাপে সম্পূৰ্ণৰূপে শিক্ষাৰ উত্তৰণ ঘটোৱা ।
২) নিজৰ নিজৰ বিষয়ৰ ওপৰত শিক্ষক সকলক প্ৰশিক্ষণৰ দ্বাৰা প্ৰস্তুত কৰি তোলা।
৩) মণ্ডল সমল ব্যক্তি সকলৰ সহযোগত সংশ্লিষ্ট বিদ্যালয়বোৰত শৈক্ষিক উত্তৰণ ঘটোৱা।
৪) জিলা শিক্ষা প্ৰতিষ্ঠান ৰ লগত খণ্ড শিক্ষাক সংযুক্ত কৰি শিক্ষাখণ্ডৰ উত্তৰণ ঘটোৱা।
৫) মাহিলি নিজৰ নিজৰ শিক্ষা খণ্ডত BACG আহ্বান কৰি মণ্ডল সমল ব্যক্তি সকলৰ লগত শৈক্ষিক দিশত ভাৱৰ আদান প্ৰদান কৰা।
৬)খণ্ড সমল ব্যক্তি সকলে BACG আৰু DACG সভাৰ প্ৰতিবেদনত উল্লেখিত বিষয়বস্তু সমূহ জিলা সমন্বয়কক অৱগত কৰোৱা।
৭) বিদ্যালয় সমূহে দিনপঞ্জীমতে পাঠদান কাৰ্য্য আৰু পৰীক্ষা সমূহ অনুস্থিত কৰিছে নে নাই নিৰীক্ষণ কৰা।
৮) ছাত্র ছাত্রী আৰু শিক্ষকৰ উপস্থিতিৰ বুজ লৈ কৰ্তৃপক্ষক জনোৱা।
৯)বিদ্যালয় ৰ মধ্যাহ্ন ভোজন, সহ বিদ্যায়তনিক দিশ, শিক্ষকৰ দিনপঞ্জী, পুথিভঁৰাল, Eco, maths, science club আদিৰ সঠিক ৰূপায়ন নিৰীক্ষণ কৰা।
১০)) খণ্ড সমল ব্যক্তি সকলে মাহেকত কমেও বাৰখন বিদ্যালয় নিৰীক্ষণ কৰি তাৰ যথাযথ প্ৰতিবেদন নিৰ্দিষ্ট প্ৰ- পত্রত খণ্ড সমন্বয়কৰ জৰিয়তে জিলা সমন্বয়কৰ কাৰ্য্যালয়ত দাখিল কৰা।
তাৰোপৰি সময়ে সময়ে মিছন সঞ্চালক মহোদয় আৰু জিলা সমন্বয়ক মহোদয়ে দিয়া দায়িত্ববোৰো সূচাৰুৰূপে পালন কৰা বাধ্যতামূলক।
খণ্ড সমল ব্যক্তি হিচাপে হাজো শিক্ষাখণ্ডত কাৰ্য্য নিৰ্বাহ কৰাটো মোৰ বাবে আন এক সফল সমাপ্তি। বৃহত্তৰ শিক্ষা খণ্ড টোৰ অন্তৰ্গত শিক্ষিত ব্যক্তি, বিশেষ কৈ শিক্ষক সকলৰ লগত আমাৰ মনৰ ভাৱ  আদান প্ৰদান কৰিবলৈ পাই মই বৰ গৌৰম্বান্বিত। আনহাতে জিলা মিছন সমন্বয়ক কাৰ্য্যালয়ৰ বিষয়া কৰ্মচাৰী আৰু জিলা প্ৰশিক্ষণ প্ৰতিষ্ঠান কামৰূপৰ প্ৰবক্তা সকলৰ বন্ধুত্ব সূলভ পৰামৰ্শ আৰু সহযোগিতা মোৰ মানসপতত চিৰস্মৰণীয় হৈ ৰ'ব।
সদৌ শেষত এটি কবিতাৰ পংক্তিৰে মোৰ লিখনিৰ সামৰণি মাৰিলো।
দূৰণিৰ পখীজাক
মিলি যায় দিগন্তত
মাথো প্ৰতিধ্বনি বাজে
সূদুৰত......।